एसिसी प्रिमियर कप ट्वान्टी–२० क्रिकेटको सेमिफाइनल खेलहरू भोलि हुँदैछ। भोलि हुने पहिलो सेमिफाइनलमा नेपालले संयुक्त अरब इमिरेट्स (युएई) सँग प्रतिस्पर्धा गर्नेछ।

ओमानमा जारी प्रिमियर कपमा समूह ‘ए’ मा रहेको समूह विजेता बन्दै सेमिफाइनलमा पुगेको हो भने युएई समूह ‘बी’ को उपविजेता बन्दै सेमिफाइनलको यात्रा तय गरेको हो।

नेपाल र युएईबीचको खेल अल अमेरात क्रिकेट ग्राउन्डमा बिहान ११ः४५ बजेबाट सुरु हुनेछ।

गत सिजनमा नेपालले फाइनलमा युएईलाई पराजित गरेर विजेता बनेको थियो। साविक विजेता समेत रहेको नेपाल आफ्नो अपराजित यात्रालाई कायम राख्दै फेरि एसिया कप खेल्ने लक्ष्य नजिक पुग्न चाहन्छ।

एसिसी प्रिमियर कपको विजेता टोलीले सन् २०२५ मा हुने एसिया कप खेल्न पाउने छ। त्यसकारण पनि नेपालका लागि जित महत्त्वपूर्ण छ। गत सिजनमा नेपालसँग पराजित भएको युएईले भोलिको खेलमा हारको बदला लिँदै उपाधि रक्षाका लागि अघि बढ्न चाहन्छ।

तर, दुबै टोलीका लागि भने जित सहज छैन। नेपालले जारी सिजनमा खेलेको ४ खेलमा सबैमा सानदार जित हात पारेको छ भने युएईले ४ खेलमा १ खेल गुमाउँदै ३ मा जित हात पारेको छ। त्यसकारण पनि साविक विजेता र उपविजेताबीच भोलिको खेल निकै रोमाञ्चक हुने मानिएको छ।

भोलिको खेलमा नेपालका ओपनर ब्याट्सम्यान कुशल भुर्तेल, आशिफ शेखसहित दिपेन्द्रसिंह ऐरीमाथि विशेष नजर रहने छ। समूह चरणको अन्तिम खेलमा राम्रो प्रदर्शन गर्न नसकेका यी खेलाडीहरूले भोलिको खेलमा कस्तो प्रदर्शन गर्छन् भन्नेमा सबैको चासो हुनेछ।

त्यस्तै अविनाश बोहरा, गुलशन झा, कुशल मल्ल, करण केसी, ललित राजवंशी र सोमपाल कामीमाथि पनि नजर रहने छ। युएईका सुरुआती ब्याट्सम्यान अलिशान सराफु, आशिफ खानलाई रोक्न सके धेरै रन बन्न पाउँदैन। त्यसकारण पनि नेपालको बलिङ्ग र ब्याटिङ्ग दुबैमा विशेष ध्यान दिनु पर्नेदेखिन्छ।

भोलि नै हुने अर्को सेमिफाइनल खेलमा समूह ‘बी’ को विजेता ओमानले समूह ‘ए’ को उपविजेता हङकङको सामना गर्नेछ। अमेरात क्रिकेट ग्राउन्डमा हुने यी दुई टोलीबीचको खेल दिउँसो ४ः१५ बजेबाट सुरु हुनेछ।

प्रकाशित: ६ वैशाख २०८१ १०:५३ बिहीबार