नेपालका आठ खेलाडीले भारतमा हुने प्रथम दक्षिण एसियाली कुराँश च्याम्पियनसिपमा प्रतिस्पर्धा गर्ने भएका छन्।

आगामी अप्रिल १९ देखि २१ तारिखसम्म भारतको केरलामा उक्त प्रतियोगिता हुँदै छ। सोही प्रतियोगिताका लागि ६ खेलाडीसहित आठ सदस्यीय नेपाली टोली बुधबार केरलातर्फ प्रस्थान गरेको छ।

सिनियर पुरुष ८१ केजीमुनि योगेन्द्र विष्ट, ७३ केजीमुनि पूजन श्रेष्ठ र ६० केजीमुनि अर्जुन क्षेत्रीले नेपालको चुनौती प्रस्तुत गर्नेछन्। महिलामा सिनियर ८७ केजीमाथि दीपिका अछाजु तथा जुनियरको ६३ केजीमुनि परी घर्ती क्षेत्री र ४४ केजीमुनि दीक्षा मगरले प्रतिस्पर्धा गर्ने भएका छन्।

टोलीको प्रशिक्षक तथा निर्णायकमा प्रवीणकाजी श्रेष्ठ तथा व्यवस्थापकमा ग्याल्जेन शेर्पा छन्। राष्ट्रिय खेलकुद परिषद्का सदस्यसचिव टंकलाल घिसिङ र नेपाल कुराँश संघका अध्यक्ष ध्रुवराज न्यौपाने लगायतले बुधबारै टोलीलाई सफलताको शुभकामना दिँदै बिदाइ गरेका थिए।

प्रकाशित: ५ वैशाख २०८१ २२:२४ बुधबार