प्रदेशसभाको पहिलो बैठकको सन्देश

शुक्रबार, १९ माघ २०७४, ०८ : ५३ सम्पादकीय


प्रदेश ३ को बैठक सुरु भएसँगै मुलुक संघीयता कार्यान्वयनको औपचारिक चरणमा प्रवेश गरेको छ । बैठकको थालनीमै प्रदेशसभा सदस्यहरूले समृद्धिका पक्षमा आवाज उठाएर यो प्रदेशका निम्ति मात्र होइन देशकै निम्ति सुखद सन्देशको प्रवाहसमेत गरेका छन् । यथार्थमा मुलुक संघीयतामा जानुपर्नाको खास कारण पनि यही हो । केन्द्रबाट मात्र शासन सञ्चालन गर्दा स्थानीय आकांक्षालाई राम्ररी सम्बोधन गर्न नसकेको महसुस गरेकै कारण यो नयाँ व्यवस्थामा जानुपरेको हो । विगतमा विकेन्द्रीकरणको  अभ्यास गर्न पनि नखोजिएको होइन । तर, स्थानीय स्तरबाटै आएका योजना–आयोजनालाई त्यहीं कार्यान्वयन गर्ने र मुलुकभरिका सबै ठाउँलाई बसौंबसौं बनाउन सक्ने काम भएको भए मुलुकले यस किसिमको व्यवस्था गर्नैपर्ने थिएन । राजधानी काठमाडौंले मात्र सिंगै मुलुकको अपेक्षालाई सम्बोधन गर्न सक्दैन भन्ने महसुस भएपछि नै जनआन्दोलन २०६२/६३ पछि सशस्त्र विद्रोहमा रहेको माओवादीलाई समेटेर यस किसिमको व्यवस्था गरिएको हो । देशका सबै भूभागलाई सात प्रदेशमा विभाजन गरी त्यसभन्दा तल स्थानीय तहको समेत व्यवस्था गरी सबै क्षेत्रबाट विकासलाई गति दिने अपेक्षा गरिएको छ । हिजो पनि स्थानीय निकायको व्यवस्था नभएको होइन । तर, तिनको काम, कर्तव्य र अधिकारभन्दा आजका स्थानीय तहलाई बढी व्यवस्थित र अधिकारसम्पन्न बनाइएको छ । प्राप्त अधिकारको सदुपयोगबाट मुलुकको चौतर्फी विकास हुनेछ भन्ने आशाबाटै यो व्यवस्था गरिएको हो । पटक–पटकका राजनीतिक परिवर्तनपछि पनि अपेक्षित अधिकार नागरिकमा नपुगेका कारण फेरिफेरि परिवर्तनका लागि संघर्ष गर्ने बाध्यता देखिएको हो । अब भने संघीयताको अभ्यासले जनतामा रहेको विकास र समृद्धिको चाहनालाई सम्बोधन गर्नुपर्नेछ।

भाबी प्रदेशसभा र प्रदेश सरकारका लागि एउटा स्तर निर्धारण गर्ने जिम्मेवारी अहिले छ । पहिलो बैठकबाट उठाइएको मुलुकको समृद्धिको आवाजलाई मुखरित गर्न र सफल पार्न सके जनताले ठूलो गुन मान्नेछन् ।

राजधानी काठमाडौंलाई समेत समेट्ने प्रदेश ३ को राजधानी हेटौंडामा बिहीबार सुरु भएको बैठक धेरै अर्थमा ऐतिहासिक हुन पुगेको छ । एक, सात प्रदेशमध्ये सबैभन्दा पहिले संसद्को बैठक यहींबाट सुरु भएको छ । दुई, जुनसुकै दलबाट प्रतिनिधित्व गर्ने भए पनि सबैले यस प्रदेशको समृद्धिको सपनालाई प्रदेश संसद्को रोस्ट्रमबाट मुखरित गरेर सिंगै मुलुकको भावनालाई प्रतिबिम्बित गरेका छन् । २०४६ सालपछिको खुला राजनीतिमा उल्लेख्य भूमिका निर्वाह गरेका नेकपा एमाले र नेपाली कांग्रेसजस्ता दलमात्र होइन पछिल्लो निर्वाचनबाट प्रदेश राजनीतिमार्फत उदाएको  विवेकशील साझाको समेत उपस्थिति यो प्रदेशमा रहेको छ ।
प्रदेशसभाको बैठकमा सहभागी सदस्यलाई स्वागत गर्न मकवानपुरको सदरमुकाम हेटौंडालाई दुलहीसरी सिँगारिनुलाई पनि स्थानीय जनतामा आफ्नै क्षेत्रमा राजनीतिक गतिविधि हुनुपर्ने भन्ने उत्कट अभिलाषालाई  प्रतिबिम्बित गरेको छ । प्रदेश राजधानी पनि काठमाडौं उपत्यकाभित्रै तोकिएको भए यहाँ आउजाउ र बसोबास गर्नेलाई सहज हुने थियो होला । तर, राजधानीबाहिर पनि केन्द्रहरू बन्न थाल्नुपर्छ । त्यसले मात्र देशको असन्तुलित विकासलाई सन्तुलनमा ल्याउने काम गर्न सक्नेछ । राजधानी काठमाडौं भन्नु अव्यवस्थित विकासको केन्द्रजस्तो भएको छ । गाउँठाउँमा बस्नुभन्दा काठमाडौं खाल्डोमा आएर मात्र अवसर प्राप्ति हुन्छ भन्ने धारणा पनि परिवर्तन ल्याउनु आवश्यक भइसकेको छ । प्रदेश संसद, त्यही संसद्बाट बन्ने प्रदेश सरकारले नै आफ्ना आवश्यकता पूरा गर्ने बाटो तय गर्नुपर्छ।

प्रदेश राजधानीहरूमा प्रदेशसभा सदस्यको शपथग्रहण कार्यक्रमपछि चहलपहल सुरु भएको हो । ती प्रदेश केन्द्रमा भौतिक पूर्वाधार तयारीको क्रम धमाधम चलिरहेको छ । जुन हिसाबमा प्रदेश बैठक बस्न र सरकारका लागि असजिलो होला भन्ने महसुस गरिएको थियो, त्यो महसुस गर्नुपरेको छैन । अस्थायी किसिमकै पूर्वाधार व्यवस्थापन पनि नराम्रो देखिएको छैन । चिटिक्क पारेर सजाइएका सभाकक्षमा सुरु भएको यो प्रक्रियाको सार्थकता केही वर्षमै पुष्टि हुनेछ । त्यतिबेला यीभन्दा पनि राम्रा पूर्वाधार प्राप्त हुनेछन् । तर, मुलुकको गन्तव्य कस्तो हुने भन्ने जिम्मा भने प्रदेशसभालाई छ । प्रदेश ३ को पहिलो बैठकमा मुखरित भएका आवाजजस्तै समृद्धि, सुशासन र सामाजिक न्यायका निम्ति योगदान गर्ने गरी निर्वाचित प्रदेशसभा सदस्यले काम गर्न सके भने पक्कै पनि त्यसको सकारात्मक प्रभाव पर्नेछ । २०६२÷६३ पछिका दिनमा प्रमुख दल र तिनका नेताले खेलेको भूमिकाप्रति सर्वसाधारणले सकारात्मक दृष्टिकोण बनाउन सकेका छैनन् । संविधान जारी गर्नेबाहेक जनअपेक्षा पूरा गर्नेतर्फ पनि योगदान पुग्न सकेको छैन । विकास निर्माणका काम अधुरा छन् । सहरको अवस्था अव्यवस्थित छ । आधारभूत तहका सेवासुविधासमेत सर्वसाधारणले पाउन सकेका छैनन् । यो स्थितिमा प्रदेश सरकारले सुधार ल्याउन सकेनन् भने अहिलेको पद्धतिप्रतिको वितृष्णा झनै गहिरो हुनेछ । आफ्नै सेवासुविधाका लागि मरिमेट्ने, जनताका समस्यालाई देखेको नदेख्यै गर्ने र केन्द्रीय राजनीतिका विकृतिको विस्तार मात्र प्रदेशमार्फत हुने हो भने संघीयताको अभ्यास खेर जानेछ । इतिहासमा पहिलो हुनुको महत्ता ठूलो छ । भाबी प्रदेशसभा र प्रदेश सरकारका लागि एउटा स्तर निर्धारण गर्ने जिम्मेवारी अहिले छ । पहिलो बैठकबाट उठाइएको मुलुकको समृद्धिको आवाजलाई मुखरित गर्न र सफल पार्न सके जनताले ठूलो गुन मान्नेछन्।





यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

नयाँ सवारी दर्ता गर्ने प्रक्रिया

नयाँ सवारी दर्ता गर्ने प्रक्रिया

नयाँ सवारी खरिद गरिसके पछि सो सवारी सडकमा चलाउनु अगाडी नै दर्ता गरिसकेको हुनुपर्छ | ग्राहकलाइ सजिलो होस् भनेर दर्ता...

कस्तो किसिमको गाडी किन्नु ठीक होला त ?

कस्तो किसिमको गाडी किन्नु ठीक होला त ?

गाडीको बनावटमा आधारित गाइड ...

किन गर्ने गाडीको बिमा?

किन गर्ने गाडीको बिमा?

भविष्यमा हुन सक्ने दुर्घटनाको बारे हामी अनविज्ञ छौं । तेस्रो पक्षको सवारी विमा गरेर यस्तो दुर्घटनाको क्षति कसरी न्यूनीकरण गर्न...

जाडो मौसममा गाडीमा आउन सक्ने समस्याहरुको समाधान

जाडो मौसममा गाडीमा आउन सक्ने समस्याहरुको समाधान

जान्नुहोस् केहि रोचक जुक्ति र ह्याकहरु जसबाट तपाइले गाडीमा आइपर्ने जाडो सम्बन्धि समस्याहरुबाट छुटकारा पाउन सक्नुहुन्छ ...

दयाहाङ किराँत संग्रहालयको सद्भावना दूत

दयाहाङ किराँत संग्रहालयको सद्भावना दूत

अभिनेता दयाहाङ राईलाई खोटाङको ऐसेलुखर्क–५ रिब्दुङ महेश्वरीमा निर्माण सुरु गरिएको किराँत संग्रहालयको सद्भावना दूत बनाइएको छ। ...

सञ्जय दत्तको बायोपिक फिल्ममा विवाद

सञ्जय दत्तको बायोपिक फिल्ममा विवाद

बलिउडका अभिनेता सञ्जय दत्तको जीवनीमा आधारित बायोपिक फिल्मको नाममा विवाद भएको छ। निर्देशक राजकुमार हिरानी र निर्माता विनोद चोपडा फिल्मको नाम...

जोहारीको ‘याँ सम्झिने कोई भएन’ को भिडियो सार्वजनिक

जोहारीको ‘याँ सम्झिने कोई भएन’ को भिडियो सार्वजनिक

गायक वीरेन्द्र जोहारी नयाँ देउडा गीतका साथ दर्शकश्रोता समक्ष आएका छन्। पेशाले नेपाल प्रहरीको प्रहरी नायव निरीक्षक पदमा कार्यरत जोहारीले...

मिथिला माध्यमिकी परिक्रमा आज महोत्तरीमा

मिथिलाको महाकुम्भ भनिने मिथिला माध्यमिकी परिक्रमाका यात्री आज महोत्तरी जिल्ला प्रवेश गरेका छन्। ...