5 Poush, 2071 |
Menu

प्रविधि

बाइबाइ गुगल रिडर

(0 votes)
बाइबाइ गुगल रिडर

क्यालिफोर्निया –  कन्टेन्ट एप्लिकेशन तथा प्लाटफर्म सेवा 'गुगल रिडर' सोमबारदेखि बन्द भएको छ। गुगलले मार्च १३ मा यो फिचर बन्द गर्ने घोषणापछि प्रशंसकले दुःख व्यक्त गरेका सूचना सर्च इन्जिन कम्पनीलाई पठाए पनि गुगलले रिडर बन्द गरेको हो। गुगलको अफिसियल ब्लगले यसको पुष्टि गरेको छ।

८ वर्षमा गुगल रिडर एउटा लोकप्रिय आरएसएस (रियली सिम्पल सिन्डिकेशन) रीडर बनेको थियो। आरएसएसले इन्टरनेटमा उपलब्ध धेरै सामग्रीलाई एउटा फिडमा जम्मा पारिदिन्छ। गुगल रिडर यसका लागि लोकप्रिय थियो।


हुन त गुगल आफ्ना सेवा बन्द गर्न कठोर निर्णय गर्ने इन्टरनेट कम्पनीको सूचिमै छ। सन् २००८ मा  'गुगल लाइभ्ली' बन्द गरेको थियो। यो थ्री डी एनिमेटेड च्याट एपको सेवालाई गुगलले ६ महिनामै बन्द गरेको थियो।


गुगलले निकै तामझामका साथ ल्याएको 'गुगल वेब्ली' पनि २०१० को अगस्टमा बन्द भइसकेको छ। यसमा इमेल, सोसल नेटवर्किङ, नेट इन्साइक्लोपेडिया तथा च्याटलाई एउटै प्लेटफर्ममा समेटिएको थियो। २०११ म जीमेलमा सुरु गरिएको 'बज' सेवा पनि भइसकेको छ। यो सेवामा गुगलले सोसल नेटवर्किङ तथा माइक्रोब्लगिङको सुविधा दिएको थियो। निकै कठोर निर्णय गर्दै प्रयोगकर्ताले रुचाएको 'गुगल टक'लाई समेत गुगलले बन्द गरिसकेको छ। गुगल टकलाई सन् २०१३ मा गुगल ह्याङ्गआउटले विस्थापित गरेको हो। सेवा बन्द गर्ने श्रृङ्खलाको पाँचौं नम्बरमा गुगल रिडर परेको हो।

कम प्रयोग मुख्य कारण

रिडर बन्द गर्नुमा खास कारण रहेको गुगलले खुलाएको छ। आफ्नो अफिसियल ब्लगमा गुगलले भनेको छ- 'रिडयरको प्रयोग कम भएको छ। हामी अन्य साना उत्पादनहरुमा ध्यान केन्द्रित गर्न चाहन्छौं।' रिडर प्रयोगकर्ताका लागि विकल्प खोज्न गुगलले तीन महिना अघि नै समय दिएको थियो। मार्च महिनामा गुगलले भनेको थियो- ‘यदि तपाइँले कुनै लेख अथवा अन्य कुनै सामग्री गुगल रिडरमा राख्नु भएको छ भने आगामी ३ महिनामा त्यसलाई सुरक्षित पारिसक्नुहोला।’ सन् २००५ मा गुगलले रिडर ल्याएको थियो।