Share this
Twitter
Digg
Del.icio.us
StumbleUpon
Facebook
Print
E-mail
काठमाडौं, मंसीर ९ (नागरिक) - उपप्रधान तथा परराष्ट्रमन्त्री सुजाता कोइरालाले कांग्रेस सभापति पिता गिरिजाप्रसाद कोइरालासँग उपचारका लागि सिंगापुरमा जाँदा आफूले गरेको खर्चबारे समाचार लेखेर नागरिकले गम्भीर षड्यन्त्र गरेको आरोप लगाएकी छिन्।
विनियोजन विधेयकमाथिको छलफलमा उठेका प्रश्नबारे जवाफ दिन संसद्को रोष्ट्रममा उभिएकी कोइरालाले गम्भीर विरामी पिता गिरिजाप्रसाद कोइरालाको उपचारमा सिंगापुर गएको बारे समाचार लेखेर नागरिकले आफू र विरामी पिताविरुद्ध गम्भीर षड्यन्त्र गरेको आरोप लगाएकी हुन्।
नेपाल मजदुर किसान पार्टीका सभासद् सुनील प्रजापतिले पिता कोइरालाको उपचारमा गएकी उपप्रधानमन्त्री सुजाताले त्यहाँ करोडौं खर्च गरेकोबारे जानकारी मागेका थिए। उपप्रधानमन्त्री कोइरालाले भनिन्, 'म त्यहाँ घुम्न गएकी हैन, पैसा खर्च गर्न गएकी पनि हैन, गिरिजाबाबु गम्भीर बिरामी हुनुभएकोले स्वास्थ्योपचारमा गएकी हुँ।'
उनले कडा शब्दमा भनिन्, 'केही पत्रिकाहरू विशेष गरी नागरिकले लेखेको हो, त्यसलाई गम्भीर रुपमा लिएको छु।' उनले सिंगापुरमा अन्तभन्दा अलि बढी खर्च हुने पनि बताइन्। आफूले गरेको राज्यकोषको फजुल खर्चको बचाउ गर्न विरामी पिता कोइरालाको व्यक्तित्वको पनि प्रयोग गर्न चुकिनन्। भनिन्, 'उहाँ मेरो बुवा मात्र हैन, देशको नेता हो। उहाँलाई यसरी बद्नाम गराउनु षड्यन्त्र गर्नु हो।'
उपचारका लागि गएका सबै जना त्यही होटेलमा बसेको जानकारी पनि दिइन्। छापिएको गाडीको फोटोबारे भनिन्, 'फोटो पनि गलत हो, त्यो गाडी मैले चढेको छैन।' आफूलाई परराष्ट्रमन्त्रीको हैसियतले त्यहीको सरकारले गाडी दिने दाबी पनि उनले गरिन्।
'नेपालको पत्रिकाको 'स्ट्याण्डर' थाहै छ, तपाईंलाई पनि त्यो आउन सक्छ', उपप्रधानमन्त्री कोइराला सबैभन्दा ठूलो कुरा पिताको स्वास्थ्य भएको दाबी गर्दै बताइन्।
नेपालको मन्त्रीले विदेशमा जाँदा दैनिक २५० अमेरिकी डलरसम्म होटलको कोठाका लागि खर्च गर्नसक्ने कानूनी व्यवस्था छ। उपप्रधानमन्त्री कोइराला भने दैनिक १४०० डलर पर्ने पाँचतारे होटेलको 'प्रेसिडेन्सियल सुइट' मा बसेकी थिइन् र लिमोजिम कारमा सवार भएकी थिइन्।
प्रतिक्रियाहरुको RSS फीड
प्रतिक्रियाहरु देखाउनुस्/लुकाउनुस्
