चुनावको अभिमतलाई बुझेर निर्वाचित नेतृत्वले विगतका नीति र नियतलाई सच्याई जनचाहना अनुरूपको विकासमा अग्रसर हुनुपर्ने समय आएको छ । भर्खरै काठमाडौँमा समेत राज्यलाई घच्घच्याउने हिसाबले धुलो र धुवाँजन्य प्रदूषणबाट मुक्ति दिलाऊ भन्दै सडक नाटकै प्रदर्शन भयो । केही अघिमात्रै कार्बन उत्सर्जनको मात्रा बढेर भारतको राजधानी नयाँ दिल्लीले ग्यास च्याम्बरको उपमा नै पायो । स्कुल, कलेजसमेत केही समय बन्द भए । सर्वसाधारणलाई सावधानीपूर्वक हिँडडुल गर्न आह्वानै ग¥यो भारत सरकारले । यसबाट त्राण पाउन नै होला सायद ! भारतले जलविद्युत् आयोजना निर्माणलाई उच्च प्राथमिकतामा राखेको छ र त २५ मेगावाटसम्मका जलविद्युत््का आयोजनालाई नवीकरणीय ऊर्जामा वर्गीकरण गर्दै प्रारम्भिक वातावरणीय अध्ययनसमेत गर्नु नपर्ने नीति अवलम्बन गरिसकेको छ । त्यसैगरी १०० मेगावाटसम्मका जलविद्युत्का आयोजनालाई सोही दायरामा ल्याउने गृहकार्य भइरहेको छ भन्छन् उनीहरू । वितरण कम्पनीहरूले उत्पादकसँग निश्चित प्रतिशत नवीकरणीय ऊर्जा खरिद नगरी कोइलाबाट उत्पादित विद्युत्मात्रै किनबेच गर्न नपाउने बाध्यकारी व्यवस्थाको प्रारम्भसमेत भइसकेको छ त्यहाँ । भर्खरै पेट कोक र फर्नेस आयलबाट ऊर्जा उत्पादन गर्नसमेत अदालतबाट बन्देज लगाएको अवस्था छ। 

विद्युत् व्यापारका लागि राम्रो–नराम्रो जे जस्तो भए पनि बाटो खुलेको छ । समय क्रमसँगै यो अझै सहज बन्दै जाला नै ।

तर हामीकहाँ कार्बनको मात्रा घटाउने मात्र नभई स्वच्छ विकासलाई बढावा दिने, ऊर्जा सुरक्षाको प्रत्याभूति गर्ने र मुलुककै अर्थतन्त्रमा सकारात्मक प्रभाव पार्ने सबै जलविद्युत् आयोजनाले अध्ययनपूर्व नै लिनुपर्ने वन मन्त्रालयको सहमति, वातावरणीय प्रभाव मूल्यांकन प्रतिवेदन स्वीकृत गराउने एवं वनक्षेत्र प्रयोगका लागि सम्झौता गर्न लाग्ने समय र आयोजना निर्माण समय झन्डै बराबर देखिन थालेको छ । जडित क्षमता १० मेगावाटभन्दा माथिका सबै जलविद्युत्का आयोजनामा हुँदै आएको वातावरणीय प्रभाव मूल्यांकनको थ्रेसहोल्डलाई बाबुराम भट्टराईको कार्यकालदेखि ५० मेगावाटभन्दा माथिका आयोजनामा मात्रै अवलम्बन गर्ने नीतिगत परिवर्तनले हुने आँकलन गरिएको वन–वातावरणको विनाश र तत्कालीन  नीतिले जोगाएको वनक्षेत्र खुट्टयाउने विज्ञानसम्मत अभिलेख कतै भेटिँदैन । बरू यसले वन र वातावरण संरक्षणका नाममा अवैज्ञानिक थ्रेसहोल्ड र तजबीजीमा खेल्ने नीति खडागरी जथाभावी विकास आयोजनाहरू अवरुद्ध गर्नु हँुदैन भन्ने जनभावना मुखरित गरेको छ। 

दिगो विकास र मानव समुदायकै हितमा केन्द्रित गर्ने उद्घोषका साथ जल, जमिन र जंगल एवं त्यहाँ रहेका जीवजन्तु, चराचुरुंगी तथा किटपतंग लगायतका हरेक प्रजातिको संरक्षणबाट सुरु भएको नेपाली वन तथा जैविक विविधता संरक्षणको इतिहास आज भूपरिधि तहमा आइपुगेको छ । विश्व बजारमा बाघ संरक्षणमा हामी निक्कै नै अगाडि पुगेका छौँ । तर देशभित्र भने त्यही बाघले निमुखा जनता मारिरहेको छ । एउटै नंग्रे बघिनीले १९ जना मान्छे मारेर ‘म्यान इटर’को दर्जा पाउने बेला भएको छ । तर न समस्याको स्थायी समाधान गर्न सकिएको छ न संरक्षणका नाममा त्यसमा आश्रित समुदायको जीवनस्तर उकास्नै सकिएको छ न त विकासका क्रियाकलापहरू नै सहज ढंगले अघि बढ्न पाएका छन् । उदाहरणका लागि मुलुकमा भित्रिएका वैदेशिक लगानीका जलविद्युत्का आयोजनालाई वनक्षेत्र उपलब्ध गराउने कार्यलाई असहज बनाएर संरक्षणको ठूलै जालेरुमाल उडाए पनि वन र संरक्षित क्षेत्र वरपर बस्ने गरिब, निमुखा र सीमान्तीकृत समुदाय भने रातदिन जंगली जनावरको आतंक र जिउनका लागि नभई नहुने प्राकृतिक स्रोत तथा साधन घाँस–दाउराबाट समेत वञ्चित हुन परिरहेको र त्यसकै लागि कैँयन्ले ज्यानै गुमाउनुपरेको अवस्था छ । केही समय अगाडि बर्दिया र सप्तरीमा हात्तीले कैँयन् मानिसको ज्यान लियो । वर्षेनि यो क्रम जारी छ । स्थानीयवासीले बर्दियामा संरक्षण कार्यालय नै बन्द गरे दबाब सिर्जना गर्न । केही वर्षअघि एकथरी सांसदहरूसमेत संरक्षित क्षेत्रमा रोपाइँ गर्न गएका थिए, सायद आक्रोश पोख्न ! वन, वातावरण र नदी संरक्षणमा लागेका अन्तर्राष्ट्रिय संघ–संस्थाहरू र तिनकै भरोसामा राज्यभित्र सक्रिय गैरसरकारी संघ–संस्था, दबाब समूह वा व्यवसायीहरूले पनि राष्ट्रिय आवश्यकतालाई नजरअन्दाज गर्ने गरेको देखिन्छ।  

नेपालले देश विकासका लागि आगामी २०२२ भित्र अति कम विकसित मुलुकको श्रेणीबाट उक्लेर विकासशील राष्ट्र र सन् २०३० सम्ममा मध्यम आयस्तर भएको मुलुकमा दरिने घोषणा गरेको छ । सोका लागि १८औँ सार्क शिखर सम्मेलनको बेला सार्कस्तरीय ऊर्जा व्यापारमा सहमति गराउन सफल पनि भएको छ । राजधानीमा सम्पन्न बिम्स्टेकको १५औँ बैठकले यसलाई थप बलियो बनाएको छ । विद्युत् व्यापारका लागि राम्रो–नराम्रो जे जस्तो भए पनि बाटो खुलेको छ। समय क्रमसँगै यो अझै सहज बन्दै जाला नै। 

राज्यले केही वर्षअघि नै मुलुक विकासका लागि चारवटा प्राथमिकता क्षेत्रहरू क्रमशः जलविद्युत्, पूर्वाधार, कृषि र पर्यटन तोकेको सर्वविदितै छ । सायद ! आउने नेतृत्वको प्राथमिकतामा पनि तत्काल कुनै बदलाव आउनेछैन । विगतका सरकारहरूले पनि प्राथमिकता प्राप्त आयोजनाहरूको विकासमा आउने सम्भावित नीतिगत, कानुनी एवं आर्थिक तथा सामाजिक क्षेत्रका जुनसुकै अवरोध र उल्झन सुल्झाउने घोषणा गरी निर्णय गर्थे । तर सरकारकै आंगिक र नीति निर्माण तहमा संलग्न निकायहरू र पूर्व सांसदहरूले समेत निर्वाचनका बखत जनदैलामा खाएको वाचा भुलेर हो या केले हो देश विकासका प्राथमिकता एवं संवेदनशीलतालाई चटक्कै बिर्सेर तत्कालीन प्राकृतिक स्रोत तथा साधन समितिमार्फत अब विद्युत् प्रसारण लाइन निर्माणका लागि योजना बनाउँदा नै वनका रुखहरू हटाउन नपर्ने प्रविधि अपनाई सोहीअनुसार कार्यान्वयन गर्ने भन्ने प्रावधान नै ल्याए।  

यसले राज्यले तय गरेको जलविद्युत् उत्पादन र प्रसारणमा लागत घटाई द्रुत गतिमा विकास गर्ने, उच्च भोल्टेजका प्रसारण लाइनबाट उत्पन्न हुनसक्ने सम्भावित जोखिमबाट गाउँबस्ती जोगाउने, रोजगारी सिर्जना गर्ने र लोडसेडिङ हटाउने र घटाउने लक्ष्यलाई कागजमै सीमित राखिदिएकाले नै अहिलेको हिउँदमा भारतबाट ल्याउनुपर्ने विद्युत् ऊर्जाको माग गत वर्षभन्दा बढेर ४०० मेगावाटभन्दा माथि पुगेको छ लोडसेडिङ मत्थर गर्न । समयमा नै यी लगायतका आवश्यक नीतिगत सुधार गर्न सकिएन र यो वा त्यो कारणले आयोजनाहरू तोकिएको समयमा बनाउन सकिएन भने आगामी कैँयन् हिउँदमा ल्याइने विद्युत् ऊर्जाको माग थप भएर जाने प्रायः निश्चित छ। 

प्रकाशित: १० फाल्गुन २०७४ ०३:०५ बिहीबार