प्रदेश ७

संसदीय दलको नेता नबन्दा सरकार गठनमा ढिलाइ

बुधबार, ०२ फागुन २०७४, ०८ : ५२ दिलबहादुर छत्याल


धनगढी – प्रदेश नम्बर ७ मा माओवादी केन्द्रले त्रिलोचन भट्टलाई मुख्यमन्त्री बनाउने टुंगो लगाएको डेढ साता भइसकेको छ । वाम गठबन्धनमा रहेका एमाले र माओवादी केन्द्रबीच बाँडफाँटमा प्रदेश नम्बर ७ मा दोस्रो ठूलो दल रहेको माओवादी केन्द्रको भागमा मुख्यमन्त्री परेको हो ।

यस प्रदेशको सबैभन्दा ठूलो दल एमालेले अहिलेसम्म संसदीय दलको नेता छानिनसकेको र दुई दलबीच मन्त्रालय बाँडफाँटका विषयमा पनि सहमति भइनसकेकाले मुख्यमन्त्री र सरकार बनाउन ढिलाइ भएको छ । मुख्यमन्त्री र सरकार बनाउन ढिलाइ भइरहेका बेला प्रदेश ७ का प्रमुख मोहनराज मल्लले बुधबार बिहान सरकार गठनबारे छलफल गर्न सर्वदलीय बैठक बोलाएका छन् ।

‘सरकार गठनलगायतका विषयमा छलफल गर्न बुधबार बिहान सर्वदलीय बैठक बोलाएको छ,’ प्रदेश प्रमुख मल्लले भने, ‘संविधानअनुसार छोटो बाटोबाट सरकार गठन गर्न छलफल गरिने छ ।’ प्रदेश सचिवालयका निमित्त सचिव हीरालाल चौधरीले कुन विधि र प्रक्रियाबाट सरकार गठन गर्ने भनेर सर्वदलीय बैठकबाट टुंगो लगाइने बताए । ‘मुख्यमन्त्रीलगायत सरकार बनाउन ढिलाइ भएकाले छलफल गर्न प्रदेश प्रमुखले सर्वदलीय बैठक बोलाएका हुन्,’ उनले भने । प्रदेश नम्बर ७ मा स्पष्ट बहुमत कुनै पनि दलको नभएकाले प्रदेशसभामा प्रतिनिधित्व गर्ने दुई वा दुईभन्दा बढी दलको समर्थन गर्ने प्रदेशसभा सदस्यलाई प्रदेश प्रमुखले मुख्यमन्त्री नियुक्त गर्ने संवैधानिक व्यवस्था रहेको छ । माओवादी केन्द्रले अघि सारेका त्रिलोचन भट्टलाई माओवादी केन्द्र र एमालेले समर्थन रहेको लेखेर प्रदेश प्रमुखलाई बुझाएपछि उनलाई प्रदेश प्रमुखले मुख्यमन्त्रीमा नियुक्ति गर्ने छन् ।

एमालेले संसदीय दलको नेता छानिनसकेकाले सरकारमा कसलाई पठाउने भन्ने टुंगो लाग्न बाँकी  छ । ‘संसदीय दलको नेताको टुंगो लागिसकेको छैन, सर्वसम्मत संसदीय दलका नेता बनाउने गरी प्रयास जारी रहेको छ,’ एमाले केन्द्रीय कमिटी सदस्य तथा बाजुराका प्रदेशसभा सदस्य प्रकाश शाहले बताए । सरकारमा कसलाई पठाउने भनेर पनि टुंगो लागि नसकेको उनले बताए ।
मन्त्रालयबारे सहमति हुन बाँकी
 यसैगरी माओवादी केन्द्र प्रदेश ७ का इन्चार्ज लेखराज भट्टले एमालेले संसदीय दलको नेता छानिनसकेको र मन्त्रालयबारे पनि कुरा गर्न बाँकी भएकाले मुख्यमन्त्री तथा सरकार गठनमा ढिलाइ भएको बताएका छन् । ‘एमालेका उपाध्यक्ष भीम रावल आज आउनुभएको छ, वहासँग छलफल गरेर सरकारका गठनबारे अघि बढ्छौं ।’ मुख्यमन्त्री बाहेक तीनजना मन्त्री भए व्यवस्थापन गर्न सजिलो हुने भन्दै उनले ३ मन्त्रालय दिन आग्रह गरेको बताए ।

‘कति सदस्यीय मन्त्रिपरिषद् बनाउने भनेर पनि छलफल चलिरहेको छ,’ उनले भने, ‘९ सदस्यीय बनाउने कि ७ सदस्यीय बनाउने भनेर हामीबीच छलफल भइरहेको छ ।’ कति सदस्यीय मन्त्रिपरिषद् बनाउने टुंगो लागिसकेपछि एमाले र माओवादीले कतिजना मन्त्री पाउने भनेर निधो गरिने छ । संख्या तोकिएपछि मन्त्रीको टुंगो लगाइने उनले बताए ।

एमाले कैलालीका अध्यक्ष तथा प्रदेशसभा सदस्य दीर्घ सोडारीले ३÷४ दिनमा संसदीय दलका नेताको टुंगो लाग्ने बताएका छन् । सहमतिबाट नै दलका नेताको टुंगो लगाउने प्रयास भइरहेको उनको भनाइ छ । संसदीय दलका नेताको टुंगो लागिसकेपछि मन्त्रीको टुंगो लाग्ने उनले बताए ।‘अहिले कसलाई मन्त्री बनाउने भन्नेमा कुरो भएको छैन,’ उनले भने । केन्द्रमा पार्टी एकतामा ढिलाइ भएकाले पनि यहाँ संसदीय दलको नेता चुन्न ढिलाइ भएको उनको भनाइ छ ।  
एमालेमा ४ जनाको चर्चा
प्रदेश ७ मा सबैभन्दा ठूलो दल एमालेमा संसदीय दलको नेता टुंगो लाग्न सकिएको छैन । संसदीय दलका नेताका लागि ४ जनाको नाम चर्चामा छ । एमाले केन्द्रीय कमिटी सदस्य तथा बाजुराका प्रदेशसभा सदस्य प्रकाश शाह, एमाले कैलालीका अध्यक्ष तथा प्रदेशसभा सदस्य दीर्घ सोडारी, एमाले कञ्चनपुरका अध्यक्ष तथा प्रदेशसभा सदस्य तारा लामा तामाङ र एमाले डडेल्धुराका पूर्वअध्यक्ष तथा प्रदेशसभा सदस्य पठानसिंह बोहरा संसदीय दलका नेताका दाबेदार छन् ।

एमालेका केन्द्रीय सदस्य प्रकाश शाहले प्रदेशसभा सदस्यमध्ये उनी पार्टीमा सबैभन्दा वरिष्ठ भएकाले स्वभाविक रूपमा दाबी भएको बताएका छन् । ‘मेरो नाममा संसदीय दलको नेतामा सहमति हुने विश्वास गरेको छु,’ उनले भने । यसैगरी कैलालीका अध्यक्ष दीर्घ सोडारीले संसदीय दलका नेतामा आफ्नो दाबी रहेको उल्लेख गर्दै सहमतिबाट टुंगो लगाउने प्रयास भइरहेको बताए । ‘साथीभाइसँग छलफलमा छु,’ उनले भने । यसैगरी कञ्चनपुरका अध्यक्ष तारालामा तामाङ र डडेल्धुराका पठानसिंह वोहराले पनि पार्टीले  दिएमा संसदीय दलका नेताको जिम्मेवारी सम्हाल्ने बताएका छन् ।
 





यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

नयाँ सवारी दर्ता गर्ने प्रक्रिया

नयाँ सवारी दर्ता गर्ने प्रक्रिया

नयाँ सवारी खरिद गरिसके पछि सो सवारी सडकमा चलाउनु अगाडी नै दर्ता गरिसकेको हुनुपर्छ | ग्राहकलाइ सजिलो होस् भनेर दर्ता...

कस्तो किसिमको गाडी किन्नु ठीक होला त ?

कस्तो किसिमको गाडी किन्नु ठीक होला त ?

गाडीको बनावटमा आधारित गाइड ...

किन गर्ने गाडीको बिमा?

किन गर्ने गाडीको बिमा?

भविष्यमा हुन सक्ने दुर्घटनाको बारे हामी अनविज्ञ छौं । तेस्रो पक्षको सवारी विमा गरेर यस्तो दुर्घटनाको क्षति कसरी न्यूनीकरण गर्न...

जाडो मौसममा गाडीमा आउन सक्ने समस्याहरुको समाधान

जाडो मौसममा गाडीमा आउन सक्ने समस्याहरुको समाधान

जान्नुहोस् केहि रोचक जुक्ति र ह्याकहरु जसबाट तपाइले गाडीमा आइपर्ने जाडो सम्बन्धि समस्याहरुबाट छुटकारा पाउन सक्नुहुन्छ ...

भलिबलले जोडेको मन

भलिबलले जोडेको मन

सामान्यतया खेलाडीलाई होम ग्राउन्डको फाइदा रहन्छ ।  समर्थनमा सुनिने हुटिङले खेलाडीको उत्साह बढाउँछ । भक्तपुरमा फागुन ३ देखि ८ गतेसम्म...

‘कान्छी’को ‘रेस्पोन्स’ बुझ्न स्वेता देश दौडाहमा (फोटो फिचर)

‘कान्छी’को ‘रेस्पोन्स’ बुझ्न स्वेता देश दौडाहमा (फोटो फिचर)

नायिका श्वेता खड्का आफूले अभिनय तथा निर्माण गरेको फिल्म ‘कान्छी’को प्रतिक्रिया लिन व्यस्त छिन्। काठमाडौंका सबै हलहरुबाट राम्रो प्रतिक्रिया पाएपछि...

अब्बल अभिनेत्री दीपिका, निर्देशकले दिए पुरस्कार

अब्बल अभिनेत्री दीपिका, निर्देशकले दिए पुरस्कार

दीपिका पादुकोणले पाँच सय रुपैयाँ पुरस्कार पाएकी छन्। उनीद्वारा अभिनित चलचित्र ‘पद्मावत’ ले राम्रो सफलता पाएको छ। उक्त सफलताबाट खुशी...

१०७ भत्किए, तीन मात्रै बने

काठमाडौं महानगरपालिका क्षेत्रमा भूकम्पले भत्किएका १०७ सम्पदामध्ये तीन मात्रै पुनर्निर्माण सम्पन्न भएका छन् । भूकम्प गएको तीन वर्ष बित्न लाग्दा...