कांग्रेसभित्र ‘बुट पालिस’

बिहिबार, १८ माघ २०७४, ०९ : ४९ सम्पादकीय


नेपाली कांग्रेसमा शुद्धीकरणको माग राख्दै केही युवा नेताले सुरु गरेको ‘बुट पालिस आन्दोलन’ ले पार्टी पंक्तिमात्र होइन, सर्वसाधारणलाई समेत तरंगित पारेको छ । उदार लोकतान्त्रिक मूल्यमान्यतामा विश्वास गर्ने मुलुककै पुरानो दल भएकाले पनि जनताको अपेक्षा हुनु स्वाभाविक हो । तर, विगतमा कांग्रेसले लिएका नीतिका कारण निर्वाचनमा जेजसरी कमजोर बन्यो, यसलाई लिएर कांग्रेसप्रति प्रश्न पनि उत्तिकै मात्रामा उठिरहेका छन् । अझ विशेष गरी पार्टीको नेतृत्वमाथि प्रश्न उठिरहेको छ । धन्य, समानुपातिकतर्फको मत परिणाम ! जसले नेतृत्वलाई थोरै भए पनि भरोसा दिएको छ । नेतृत्वमाथि आवाज उठाइरहेकालाई मत्थर पार्न पनि यो परिणाम प्रस्तुत गरिएको छ । समानुपातिकमा कांग्रेसको उपस्थिति प्रत्यक्षतर्फको निर्वाचनमा पहिलो स्थानमा रहेको एमालेकै हाराहारीमा छ । तैपनि कांग्रेसले जे–जस्तो उपलब्धि निर्वाचनमा हासिल गर्नुपर्ने थियो, त्यो हुन नसकेको अनुभव दलका नेताकार्यकर्ताको छ । कांग्रेसका केही नेता कुनै बेला अविचलित त्यागका निम्ति चिनिन्थे । त्यसमध्येका एक थिए– सन्त नेता कृष्णप्रसाद भट्टराई । उनकै नाममा स्थापित संस्था कृष्णप्रसाद भट्टराई प्रतिष्ठानको ब्यानरमा सुरु भएको ‘बुट पालिस आन्दोलन’ मा युवा नेता धनराज गुरुङ, चन्द्र भण्डारी आदिको नाम जोडिएको छ । यी युवाले आफ्नो दलको कमजोर प्रस्तुतिको निदान शुद्धीकरण अभियानबाट गर्न सकिन्छ भन्ने सोच बनाउनु आफैंमा सकारात्मक छ।

राजनीतिक नेतृत्वले आफूलाई सुधार गर्ने र युवाहरूले त्यसका लागि निरन्तर आफूलाई क्रियाशील गरिरहने हो भने ‘बुट पालिस’ आन्दोलनको सार्थकता हुनेछ।

२०१७ सालमा प्रजातन्त्र अपहरणमा परेयता कांग्रेसले ३० वर्षसम्म संघर्ष गरेको इतिहास छ । पछि वामपन्थीसँगको सहकार्यबाट मुलुकमा प्रजातन्त्र पुनस्र्थापनमा कांग्रेसले नेतृत्वदायी भूमिका निर्वाह ग¥यो । सत्तामा रहेका बेला कांग्रेसको प्रस्तुति सकारात्मक हुन सकेन । प्रायः यो आफ्नै आन्तरिक गुटबन्दीको सिकार बन्यो । जनआन्दोलन २०४६ को सफलतापछि सुविधाजनक बहुमतमा रहेको कांग्रेसको सरकार तीन वर्ष पनि टिक्न सकेन । तत्कालीन प्रधानमन्त्री गिरिजाप्रसाद कोइरालाले मुलुकलाई मध्यावधि निर्वाचनमा लैजाने काम गरे पनि त्यसले कांग्रेसलाई दोस्रो दलका रूपमा स्थापित गर्न पुग्यो । त्यसयता कुनै पनि दलले भरपर्दो गरी सत्ता सञ्चालन गर्न सकेका छैनन् । अस्थिर सरकारका कारण मुलुकले कहिल्यै प्रगति गर्न सकेन भन्ने यतिबेला सबैलाई लागिरहेको छ । त्यसो त सरकार परिवर्तन चाँडोचाँडो हुनेमा दक्षिण कोरियाजस्ता मुलुक पनि छन् । तर सरकार परिवर्तनले मुलुकको विकास र प्रगति अवरुद्ध गरेको देखिँदैन । हामीकहाँ भने सरकार परिवर्तन र राजनीतिक अस्थिरताका नाममा कुनै पनि काम समयमा हुँदैनन् । पुरानो सरकारको बहिर्गमन र निर्वाचनबाट नयाँ सरकार आउने यो बेलामा संक्रमणकै क्रममा केही महिनादेखि विकास निर्माणका काम पूरै ठप्प छन् । यस्तो परिवेशमा स्थिरताका नाममा वाम गठबन्धनले बहुमत ल्याउने मौका पाएको छ । मुलुकमा स्थिरताले विकास ल्याउँछ भन्ने उत्साह एकातिर भए पनि कांग्रेस कमजोर हुँदा मुलुकका प्रजातान्त्रिक संस्थाहरू पनि कमजोर हुन सक्ने भय पनि उत्तिकै छ । आर्थिक क्षेत्रमा विचलनकारी अभिव्यक्तिहरू सरकार नबन्दै आउन थालेका छन् । यो स्थितिमा कांग्रेस युवाहरूले शुद्धीकरणका लागि थालेको अभियान पक्कै पनि समग्रमा मुलुकको हितनिम्ति उन्मुख हुन प्रेरित गर्नेछ।

संसारभरि प्रजातान्त्रिक संस्थाहरू कमजोर हुन थालेका छन् । अतिवादी नाराहरूले निर्वाचनमा विजय प्राप्त हुन थालेको छ । अमेरिकाजस्ता दरिला मुलुकका प्रजातान्त्रिक संस्थासमेत धर्मराउन थालेका छन् । हामीकहाँ प्रजातन्त्रका खम्बाहरू आफैंमा कमजोर देखिन थालेका छन् । संसद्, न्यायालय र अन्य संवैधानिक अंगले अपेक्षित काम गर्न नसक्ने स्थिति सिर्जना हुँदै गएमा प्रजातन्त्रप्रतिको जनविश्वास कमजोर हुन सक्ने देखिन्छ । दुई सय वर्षयता संसारभरि प्रजातन्त्रको जसरी विकास भइरहेको थियो, त्यो गति यतिबेला रोकिएको अनुभव धेरैले गर्दै आएका छन् । निर्वाचनमा प्रचण्ड बहुमत ल्याएर फेरि तानाशाही स्थापना गर्नेतर्फ कैयन् मुलुक उन्मुख भएका छन् । प्रजातन्त्र भएका मुलुकमा प्रगति र विकास हुन्छ भन्ने विश्वासलाई चीनजस्ता राजनीतिक स्वतन्त्रता नभएका मुलुकको आर्थिक प्रगतिले खण्डित गरिरहेको छ । यस्तो विचलित वर्तमानमा कांग्रेसजस्तो वैयक्तिक स्वतन्त्रताका निम्ति प्रतिबद्ध दल कमजोर हुन थाल्नु भनेको आफैंमा चिन्ताको विषय हो । र, पछिल्लो निर्वाचनका क्रममा कांग्रेसको अवस्थालाई लिएर अनेकन् लेखकले निरन्तर कलम चलाइरहेका छन् । कांग्रेसको अहिलेको गुमेको अवसरलाई ध्यानमा राखेर यसभित्रका सम्भावना भएका युवा नेताहरूले पहल थाले भने पक्कै पनि केही वर्षमै स्थिति फरक हुनेछ । राजनीतिक नेतृत्वले आफूलाई सुधार गर्ने र युवाहरूले त्यसका लागि निरन्तर आफूलाई क्रियाशील गरिरहने हो भने ‘बुट पालिस’ आन्दोलनको सार्थकता हुनेछ । दलभित्रको भ्रष्टीकरणले मुलुक र प्रजातन्त्र दुवैलाई थप कमजोर हुनबाट जोगाउन युवा कांग्रेसको काँधमा गम्भीर जिम्मेवारी छ।





यसमा तपाईको मत

तपाईंको रुचि अनुसारको समाचारको लागि खाता खोल्नुहोस् ।

अन्य समाचार

नयाँ सवारी दर्ता गर्ने प्रक्रिया

नयाँ सवारी दर्ता गर्ने प्रक्रिया

नयाँ सवारी खरिद गरिसके पछि सो सवारी सडकमा चलाउनु अगाडी नै दर्ता गरिसकेको हुनुपर्छ | ग्राहकलाइ सजिलो होस् भनेर दर्ता...

कस्तो किसिमको गाडी किन्नु ठीक होला त ?

कस्तो किसिमको गाडी किन्नु ठीक होला त ?

गाडीको बनावटमा आधारित गाइड ...

किन गर्ने गाडीको बिमा?

किन गर्ने गाडीको बिमा?

भविष्यमा हुन सक्ने दुर्घटनाको बारे हामी अनविज्ञ छौं । तेस्रो पक्षको सवारी विमा गरेर यस्तो दुर्घटनाको क्षति कसरी न्यूनीकरण गर्न...

जाडो मौसममा गाडीमा आउन सक्ने समस्याहरुको समाधान

जाडो मौसममा गाडीमा आउन सक्ने समस्याहरुको समाधान

जान्नुहोस् केहि रोचक जुक्ति र ह्याकहरु जसबाट तपाइले गाडीमा आइपर्ने जाडो सम्बन्धि समस्याहरुबाट छुटकारा पाउन सक्नुहुन्छ ...

दयाहाङ किराँत संग्रहालयको सद्भावना दूत

दयाहाङ किराँत संग्रहालयको सद्भावना दूत

अभिनेता दयाहाङ राईलाई खोटाङको ऐसेलुखर्क–५ रिब्दुङ महेश्वरीमा निर्माण सुरु गरिएको किराँत संग्रहालयको सद्भावना दूत बनाइएको छ। ...

सञ्जय दत्तको बायोपिक फिल्ममा विवाद

सञ्जय दत्तको बायोपिक फिल्ममा विवाद

बलिउडका अभिनेता सञ्जय दत्तको जीवनीमा आधारित बायोपिक फिल्मको नाममा विवाद भएको छ। निर्देशक राजकुमार हिरानी र निर्माता विनोद चोपडा फिल्मको नाम...

जोहारीको ‘याँ सम्झिने कोई भएन’ को भिडियो सार्वजनिक

जोहारीको ‘याँ सम्झिने कोई भएन’ को भिडियो सार्वजनिक

गायक वीरेन्द्र जोहारी नयाँ देउडा गीतका साथ दर्शकश्रोता समक्ष आएका छन्। पेशाले नेपाल प्रहरीको प्रहरी नायव निरीक्षक पदमा कार्यरत जोहारीले...

मिथिला माध्यमिकी परिक्रमा आज महोत्तरीमा

मिथिलाको महाकुम्भ भनिने मिथिला माध्यमिकी परिक्रमाका यात्री आज महोत्तरी जिल्ला प्रवेश गरेका छन्। ...