Thursday 16 Ashwin, 2071 |
Menu

अर्थ

softworica

दसैंसम्म आन्तरिक उडानमा निगमका चार जहाज

  • बिहीबार २० असार, २०७०
  • सुशील भट्टराई
  • DISQUS_COMMENTS
(0 votes)
दसैंसम्म आन्तरिक उडानमा निगमका चार जहाज
काठमाडौं - राष्ट्रिय ध्वजावाहक नेपाल वायुसेवा निगमले तीन महिनाभित्र तीनवटा थपेर चार जहाजबाट आन्तरिक उडान गर्ने तयारी तीव्र पारेको छ। यसका लागि निगम व्यवस्थापनले त्रिभुवन अन्तर्राष्ट्रिय विमानस्थलमा लामो समयदेखि 'ग्राउन्डेड' आफ्ना दुईटा टि्वनअटर जहाजका चार थान इन्जिन सम्बद्ध कम्पनीलाई दिएर नयाँ ल्याई जहाज थप्न लागेको हो। इन्जिन साट्न निगमले मंगलबार अन्तर्राष्ट्रिय टेन्डर आह्वान गरेको छ।
'आन्तरिक उडानलाई थप विश्वसनीय बनाउन र सकेसम्म उडान गर्न तीनवटा जहाज थप्न लागेका हौं,' निगमका सम्बद्ध एक अधिकारीले बुधबार नागरिकसँग भने, 'ती जहाज उडाउन चाहिने चारवटा इन्जिन साट्न टेन्डर मागेका हौं।' 
दुईमध्ये एक टि्वनअटर गत जेठ ३ गते मुस्ताङको जोमसोममा दुर्घटनाग्रस्त भएपछि निगमले हाल १९ सिट क्षमताको एउटा टि्वनअटरबाट २६ आन्तरिक गन्तव्यमा उडान गरिरहेको छ। यिनमा अधिकांश दुर्गम भेगका गन्तव्य छन्। अब थप्न खोजिएको जहाज पनि यस्तै टि्वनअटर नै हुन्। निगमसँग रहेका टि्वनअटर ४० वर्षभन्दा बढी उमेरका हुन्। सबै क्यानडामा बनेका हुन्। 
'आगामी दसैंभित्र थप तीनवटासहित चार टि्वनअटरबाट आन्तरिक गन्तव्यमा उडान गछौं,' ती अधिकारीले भने, 'त्यसपछि आन्तरिक उडानतर्फ हामी अझै बलियो हुने पक्का छ।' आगामी जुलाई, सेप्टेम्बर र अक्टोबरमा गरी तीनवटै जहाज सञ्चालनमा आउने उनले जानकारी दिए। 
इन्जिन साट्न इच्छुक इन्जिन मर्मतसम्भार ओभरहल एजेन्सीहरूका लागि निगमले १५ दिन म्याद राखेर टेन्डर आह्वान गरेको हो। 'पिटि६ए–२७' इन्जिन एउटै दरमा साट्नुपर्ने सर्त निगमको छ। टेन्डर हाल्ने कम्पनीसँग यस्तो इन्जिन मर्मत/ओभरहल गर्ने क्षमता र सुविधा हुनुपर्ने पनि निगमले जनाएको छ। 
निगमको टेन्डर सूचना अनुसार इच्छुक कम्पनी अमेरिकाको फेडेरल एभिएसन अथोरिटी (एफएए) वा युरोपियन एभिएसन सेफ्टी एजेन्सी (इएएसए) र स्थानीय राष्ट्रको नागरिक उड्डयन प्राधिकरणबाट अनुमति प्राप्त हुनुपर्छ। जति परिमाणको वित्तीय प्रस्ताव पेस गर्ने हो, प्रतिष्ठित अन्तर्राष्ट्रिय बैंकबाट कुल प्रस्तावको शून्य दशमलव १ प्रतिशत ग्यारेन्टी र काउन्टर ग्यारेन्टीवापत नेपाली वाणिज्य बैंकमा धरौटी राख्नुपर्ने छ। 
निगमले पिसिइ ४०४२१, पिसिई ४१२१८, पिसिइ ४१८१३ र पिसिइ ४२२७५ कोर युनिटका चार इन्जिन साट्न लागेको हो। यसअघि जेठ १ गते ६ वटा इन्जिन साट्न आह्वान गरिएको ग्लोबल टेन्डरमा सहभागी भएको भारतीय एक कम्पनीले दुईवटा इन्जिन साट्न पाउने भएको छ। 
भारतको बर्मन एभिएसन प्रालिले निगमका दुईवटा इन्जिन साट्न पाउने भएका हुन्। बाँकी चारवटा इन्जिनका लागि भने टेन्डरअनुसार कसैको पनि सर्त पूरा नभएपछि पुनः टेन्डर आह्वान गरिएको हो। 
'हाम्रो दुईवटा इन्जिन बर्मनले लान्छ र ओभरहल गरेर राखेको उसको इन्जिन पठाउँछ,' सम्बद्ध अधिकारीले भने, 'एउटा इन्जिन साट्न करिब २ लाख ५० हजार अमेरिकी डलर (२ करोड ३७ लाख ५० हजार रुपैयाँ) खर्च लाग्छ। अब केही दिनभित्रै बर्मनसँग इन्जिन साटफेर सम्झौता हुन्छ र उसले इन्जिन लान्छ।'
आफैंले इन्जिन पूर्णमर्मत (ओभरहल) गर्न ६ देखि आठ महिना लाग्ने भएका कारण निगमले इन्जिन साट्ने योजना ल्याएको ती अधिकारीले बताए। आफ्ना पुराना इन्जिन दिएर सम्बद्ध कम्पनीले मर्मत गरी तयारी अवस्थामा राखेका इन्जिन लिने गरी टेन्डर मागेको हो। 
निगमले साट्न खोजेका ६ वटै इन्जिन चालु हालतमा भने छैनन्। यिनलाई ओभरहल गरे चल्छन्। निगमले भने ट्वीनअटरका इन्जिन एउटालाई ४ हजार घन्टा उडाएपछि ओभरहल गर्दै आएको छ। 
दुई दशकअघिसम्म आन्तरिक उडान गर्न निगमसँग करिब एक दर्जन जहाज थिए। कुनै दुर्घटनामा परेर, कुनै ग्राउन्डेड भएरलगायत कारण साना जहाज संख्या घट्दै अहिले निगम एउटामात्र टि्वनअटर जहाजमा खुम्चिन पुगेको छ। 
पछिल्लोपटक जेठ ३ मा दुईमध्ये एउटा टि्वनअटर जोमसोममा दुर्घटना भएपछि एउटा बाँकी भएको हो। एक दशकदेखि त्रिभवुन विमानस्थलमा ग्राउन्डेडमध्ये दुईवटा टि्वनअटरलाई निगमले निजी क्षेत्रको आन्तरिक वायुसेवा कम्पनी तारा एयरलाई भाडामा दिएको छ। तीमध्ये एउटा जहाज दुर्घटनामा परिसकेको छ। सरकारले तोकेको भाडा दरमा उडान गर्नुपर्दा निगमले आन्तरिक उडानमा पर्याप्त आम्दानी गर्न सकेको छैन।
सस्तिँदा पनि सुनको माग बढेन

सस्तिँदा पनि सुनको माग बढेन

काठमाडौं- दसैंको बेला सुन सस्तिँदा पनि यसको व्यापारमा कमी आएको छ। पोहो र परारभन्दा यो वर्ष दसैंमा सुन सस्तो छ। तैपनि मूल्य अझै घट्ने अनुमानले गर्दा सुनका उपभोक्ता 'पर्ख र...

दसैंमा ३० प्रतिशत रेस्टुरेन्ट खुल्ने

दसैंमा ३० प्रतिशत रेस्टुरेन्ट खुल्ने

काठमाडौं-दसैंका महाअष्ठमी, नवमी र टीकाको दिन नजिँकिदै गर्दा राजधानी सुनसान हुँदै जान्छ। सानादेखि ठूला पसल तथा व्यापारिक प्रतिष्ठान सबैजसो बन्द हुन्छन्। तर, राजधानीका केही रेस्टुरेन्टले दसैंको सुनसान समयमा पनि खुलै...

खसीबोकाको मूल्य तोकियो

खसीबोकाको मूल्य तोकियो

काठमाडौं- नेपाल खाद्य संस्थानले यसपालि दसैंमा बेच्ने खसीबोकाको मूल्य प्रतिकिलो चार सय ६ देखि चार सय २५ रुपैयाँसम्म तोकेको छ। यो मूल्य पोहोरको तुलनामा सातदेखि १० प्रतिशतसम्म बढी हो।

दशैँमा टेलिकम ग्राहकले के के छुट पाउने?

दशैँमा टेलिकम ग्राहकले के के छुट पाउने?

काठमाडौं-नेपाल टेलिकमले सोमबारदेखि दसैँ, तिहार र छठ पर्वलाई लक्षित गरी आफ्नो विभिन्न सेवामा छुट स्किम ल्याएको छ। टेलिकमले जिएसएम र सिडिएमए सेवामा कम्पनीभित्रको नेटवर्कमा एसएमएस गर्दा ५० प्रतिशत छुट दिएको...

'मेडिकल अनफिट' धमाधम मलेसिया

'मेडिकल अनफिट' धमाधम मलेसिया

काठमाडौं- बागलुङ पाखाथरका राजीव सापकोटा नेपालमा स्वास्थ्य परीक्षण गराएर गत भदौ ५ मा मलेसिया उडे। उता पुगेपछि फोमेमा (मलेसियामा स्वास्थ्य परीक्षण गर्ने संस्था) ले परीक्षण गर्दा उनको छातीमा दाग भेटियो।...

कागजबाट पेन्सिल बनाउँदै महिला

कागजबाट पेन्सिल बनाउँदै महिला

काठमाडौं-तीन वर्षअघिसम्म सुधा बस्नेत महिलाका विषयमा लेख लेख्थिन्, महिलाको काम, सामाजिक–आर्थिक अवस्था, आय आर्जन, शिक्षा, सीपमूलक तालिम जोडेर। तर, उनले जुन वर्गलाई लक्षित गरिन्, लेखको सन्देश उक्त समूहसम्म पुगेजस्तो लागेन।...

४० प्रतिशत सामग्री खासाको गोदाममै थन्कने

४० प्रतिशत सामग्री खासाको गोदाममै थन्कने

सिन्धुपाल्चोक- दसैं विदा सुरु हुनुअघि खासाबाट बढीमा ६० प्रतिशतमात्र चिनियाँ सामग्री नेपाल भित्रने भएको छ। अब तीन दिनमात्र तातोपानी भन्सार खुल्ने भएकाले झण्डै ४० प्रतिशत सामग्री आयात गर्न नभ्याईदा गोदाममै...

तीन सय ७९ जना फर्काइए

तीन सय ७९ जना फर्काइए

काठमाडौं- मलेसियामा कार्यरत कम्पनी छोडेर गैरकानुनी रुपमा बसेका कारण जेलमा रहेका ६० सहित अरु तीन सय नौजना नेपालीलाई उद्धार गरी बिहीबार स्वदेश ल्याइएको छ।